لي حاب يشوف بوقالتو واش تقول يدخل ...

مرحبا بيكم في قعدة جزائرية
قعدتنا زينة... فيها لحباب والنساب ...والبراني يقعد زاه قدام الباب... قعدتنا مبروكة سعيدة..فريدة... ما ليها عنيدة ...كل واحد ينوي بنية صافية
بحرف الاول من اسمو
بدون اطالة عندي ليكم اجمل البوقالات يلا نبداو
البوقالة رقم .. 1 .. في خاطر كامل لي يبدا اسمهم بالحرف " A "
البوقالة :
يا شمس واش بيك ذابلة ؟؟ إذا بيك على الزين راني نفكر فيك ..
و إذا بيك على الزهر ربي ما يتخلي عليك .. و إذا بيك على الهنا .. ربي يهنيك ..
الفال :
ساسك متين و صحيح .. و فالك مليح ..


البوقالة رقم .. 2 .. في خاطر كامل لي يبدا اسمهم بالحرف " B "

البوقالة :
جازوا عليا ثـلاث شبـان .. اللّـوّل قالـي: من صابك خاتم في يـدي ..
و الثاني قالي : من صابك سنسلة في رقبتي .. و الثالث قالي : من صابك أم أولادي ..
الفال:
الثالث عرف يختار .. راه يحوس يعمر الدار .. ( ربي يكمل )


البوقالة رقم .. 3 .. في خاطر كامل لي يبدا اسمهم بالحرف " C "

البوقالة : بسم الله بديـت .. و علـى النبـي صليـت .. سمعـت قــرع الحمــام .. في قاع السجنة .. لا من سقاه الماء .. ولا من عطاه شعير .. يا قمر :
الحمام يعيا و يحن .. و نـعـــودو لـزمـــان كيمـــا كـنـــا ..
الفال :
الحب في القلب لهّاب .. الولف و الفراق .. صعاب .. و ربي يرجّع لحباب


البوقالة رقم .. 4 .. في خاطر كامل لي يبدا اسمهم بالحرف " D "

البوقالة : سألونـي من مكـة للمدينـة .. و الله مـا ننسـاك يـا نــور عيـنـيــا .. سألونـي عليـك .. من تونس للجزائـر .. و الله ما ننساك يا ضوء البصر .. يــاك لــي بـعـيــد عــن العـيـــن .. بـعــيـــد علـى القـلــب ..
الفال:
مرات البعد يكون فيـه فايدة .. و يشعل في القلب نيران الحب من جديد


البوقالة رقم .. 5 .. في خاطر كامل لي يبدا اسمهم بالحرف " E "

البوقالة :
أنا مهري غالي .. و لي يحب يديني يحسب النجوم و يسهر الليالي ..
و يبنيلي قصر في العلالي .. و إذا جا غزالي .. نعيش فيه هانية .. و نجيب البنات و الذراري ..
الفال:
الطمع .. يفسد الطبع .. نتمناو يجي غزالك .. و يرتاح بالك ..


البوقالة رقم .. 6 .. في خاطر كامل لي يبدا اسمهم بالحرف " F "

البوقالة :
طلّت مـن التـاقـة .. بانت شوشتها .. بيوضتها غلبت جلدتها ..
قلتلهم واش يصبر قلبي على محبتها ؟؟
الفال:
افرحي يا العدرا .. و ربي يهنيك .. راني نوصيك .. عمرك ما تنساي لي يبغيك


البوقالة رقم .. 7 .. في خاطر كامل لي يبدا اسمهم بالحرف " G "

البوقالة :
ماشـي و يـقـرقــب فـي صـبــاطـــو .. قـلـتـلـــو ادخـل يـا الشباب ..
قـالــي مـابـيـــاش طـعـامـكــم .. بـيـــا الشـابـــة لـــي عـنـدكــــم ..
الفال :
ما يتلامش القلب المحروق .. دمو سال من الحب و الشوق ..


البوقالة رقم .. 8 .. في خاطر كامل لي يبدا اسمهم بالحرف " H "

البوقالة :
جـايـــز علـى بـاب دارنـا .. و يـاكــل في الـتــوت .. و يـقـــول ..
غـيـر أعطـونــي بنتـكـم هـاد العـام .. ولا نقـتـل روحـي و نـمـــوت ..
الفال:
ردي بــالك يـديـــــرهـــــا .. و تـــــدّي ذنــوبــــو ؟؟

البوقالة رقم .. 9 .. في خاطر كامل لي يبدا اسمهم بالحرف " I "

البوقالة :
كنت وردة منـورة عليكـم .. وذبلت و رميـتـونـي .. كنت شمعة ضاويـة .. لحقتـوا و طفيتونـي .. أنا عملت فيكم الخيـر .. و انتومـا عملتـوا فيـا غير الدونـي .. و عـلـى حبـيـبــي بـعـدتـونــي .. ربـي وكـيـلـكــوم يـا لـي خـدعـتــونـــي ..
الفال :
كنتي .. و مازلتي وردة .. و تبقاي وردة .. زكارة في لي خدعوك ..


البوقالة رقم .. 10 .. في خاطر كامل لي يبدا اسمهم بالحرف " J "

البوقالة :
خاتـم الـذهـب مـا يقـبـل المهـانـة .. شكـون لـي صبـر علـى حبيبـو .. كيما صبرت أنا ؟ قطعت اللحم و عرفت عبارو .. و سمعت الكلام و عرفت من قالو .. السبع في غارو .. و الكلاب نباحة عند دارو .. و ما دارت والو ..
الفال :
الكلاب ما عندها ما تدير ؟ تنبح و تعيا و تسكت .. ديري روحك ما سمعتيش ..


البوقالة رقم .. 11 .. في خاطر كامل لي يبدا اسمهم بالحرف " K "

البوقالة :
الدار قدام الدار .. و التاقة قدام التاقة .. و القلوب تـوَّاقـــة .. يا عباد الله .. ما أحلى القلوب كي تتلاقى .. لحبيبي راني مشتاقة ..
الفال :
ربي يطفي الجمرة .. و يلاقيك بـحــبــيـــك في الستـرة ..


البوقالة رقم .. 12 .. في خاطر كامل لي يبدا اسمهم بالحرف " L "

البوقالة :
لسمر يا لسمر .. يا لي مـعــرَّش على الياسمين .. أنا نخمم عليك .. بعدما عايروني بيك .. حبّوا يفرقوني عليك .. أنت خويتم و أنا فصيص فيك .. نحبك و نموت عليك .. و غير أنا لي نديك ..
الفال :
بالمحبة و الحنانة .. حاجة ما راهي صعيبة .. ان شاء الله تنالي المرغوب ..

البوقالة رقم .. 13 .. في خاطر كامل لي يبدا اسمهم بالحرف " M "

البوقالة :
يا يما .. يا بابا .. راني رايـحــة نقـطـع البحـور .. و ما تـزيـدوا تشوفوني .. و إذا جـيـتــو تحبوني .. بحبيبي زوجوني .. هكذا نتهنى .. و تهنوني ..
الفال :
ما عندك وين تروحي .. دارك .. ترفد هبالك !!


البوقالة رقم .. 14 .. في خاطر كامل لي يبدا اسمهم بالحرف " N "

البوقالة :
سبحـان من صـورك .. و خـلّاك فتنة للنـاس .. ما ولـدوك في البهجـة .. ولا مراكش .. ولا فاس .. فاتحة على خدك سبع حباس .. ورد و ياسمين وقرنفل وباس .. ديتي كامل السّر واش خليتي للناس ؟؟
الفال :
خلـيـتـيـلــهــوم الغـيــرة .. و وجـــع الـــــــراس !!!

البوقالة رقم .. 15 .. في خاطر كامل لي يبدا اسمهم بالحرف " O "

البوقالة :
يا الشـابـة .. يا لحنـيـنـة ..انـتـي كـي الـوردة فـي الكــاس .. شفت عليك الغبينة .. ما راكيش لاباس ؟؟ خبريني و نحي عليك الهانة ..
قلـتـلـــو رانــي لابــاس .. بـصــح قـلـبــي معـمـر مـن كـلام الـنــاس ..
الفال :
لي يسمع كلام الناس ما يتهنى .. ما يعيش لاباس .. ديري روحك ما سمعتيش


البوقالة رقم .. 16 .. في خاطر كامل لي يبدا اسمهم بالحرف " P "

البوقالة :
فال يا فلفال يا فاتح سبع قفال ... اجبرلي سعدي مهما كان .. من الشرق و لا من الغرب ولا من الشمال .. وقولو لَـلِّي ضاق صبرو يشد في حبال الرجا .. و علاش يتنكد .. يتكل على الله ياك ربي العالي ما يضيع حد ..
الفال :
يـا رب ارض عـنـا و رضـيـنــا .. و افـتـحـلـنــا بـيـبــان الخـيــر ..


البوقالة رقم .. 17 .. في خاطر كامل لي يبدا اسمهم بالحرف " R "

البوقالة :
الوردة يا الوردة .. صيفتك تبهر .. و ريحتك تعطر .. ندخل لجنانك نخطفك .. و أنا بالبرنوس مستر .. نديرك في بستاني .. و نكون خديمك طول زماني ..
الفال :
الله يخليك كي الوردة .. لي يشوفك يحبك ..

البوقالة رقم .. 18 .. في خاطر كامل لي يبدا اسمهم بالحرف " Q "

البوقالة :
لي بنا بالحجر .. خير من لي بنا بالياجور .. الناس ترمي خطوة للقدام .. و أنا خطوة لور .. و لي زرع الريح .. ما يحصد .. غير غبارو .. فاعـل الخيـر منـّـيه بالفـرح ..
و اشكـرو فـي الحيـن .. و فاعـل الشـر خلّيـه .. فعـلــو يـرجــع عليـه .. و لـو بعـد سـنيــن ..
الفال :
الدنيـا هاذي دالات .. نهـار ليك .. و نهـار عليـك .. كي تضحكلك ما تامنيهاش


البوقالة رقم .. 19 .. في خاطر كامل لي يبدا اسمهم بالحرف "S "

البوقالة :

كنت مهني قبل ما نعرفك ..كنت نحلم في بلادي كيما السلطان ..
و اليوم مكتوب ربي لاقاني بيك و ملكتني كيما ملك سيدنا سليمان .. الطير و الجان.. هذي هي حالة القلب اللي تبلى بيك .. و الله ما ننساك حتى في الاكفان ..
الفال :
الله يحسن عونو القلب لي تبلى بيك ..

البوقالة رقم .. 20 .. في خاطر كامل لي يبدا اسمهم بالحرف "T "

البوقالة :

غلقت باب الغالي .. دفة على دفة .. فراشو من حرير نرقد وندفا ..
بوقالو من ذهب نشرب و نروى .. وكلامو من عسل .. غير نذوق منو نشفى ..
الفال :
هكدا المحبة .. و المعزة تكون .. لا توسيس و لا ظنون..!


البوقالة رقم .. 21 .. في خاطر كامل لي يبدا اسمهم بالحرف "U "

البوقالة :

قولتلهم نبغيها قالولي هذا سحور .. قولتلهم هي ممو عينيا ..
قالولي تجري و تعيا و تدور .. قولتلهم غير أنا لي نديها .. و نقيم معاها لفراح و السرور ..
الفال :
زهرك مع واحد يحبك و يخاف عليك بزاف .. ربي يكمللكم ..

البوقالة رقم .. 22 .. في خاطر كامل لي يبدا اسمهم بالحرف "V "

البوقالة :

كيفاش أنا نحبك و أنتِ تشكي فيا .. ياك هديت قلبي لقلبك ..
و درتك ممو عينيا .. اطلبي من خالقك في يوم تكوني ليا .. ذاك اليوم يهني بالك .. و تـقـــولــــي .. واش راح عـلـيـــا ؟؟
الفال :
عندو الحق مسكين .. ريحيه .. و ريحي روحك .. باين يحبك بزاف ..

البوقالة رقم .. 23 .. في خاطر كامل لي يبدا اسمهم بالحرف "W "

البوقالة :

بعثلك سلامي في الماء لزرق .. بعثلك دموعي لي في القلب تحرق .. والله مادريت بلي الحب لي بيني وبينك يفرق .. نكوي هذا القلب باش ما يزيدش يعشق ..
الفال :
الشكوى للعالي ربي خالق الكون .. هولي يصلحلك حالك ..

البوقالة رقم .. 24 .. في خاطر كامل لي يبدا اسمهم بالحرف "X "

البوقالة :

قلبي شعلـت فيـه النـار .. مـن عشـق الجـار .. عاونيني يا يمـا ..
شوفي ما صرا بيا .. حبيبي هو سباب قرحتي .. سلبني بالزين .. والحاجب والعين .. راني شادة فيه حتى يوم الدين ..
الفـال :
اذا تـاخذي الراي ؟؟ شدي في ربي خيــر .. جيل هاذ الوقت تع تمسخير!!!


البوقالة رقم .. 25 .. في خاطر كامل لي يبدا اسمهم بالحرف " Y "

البوقالة :

حبيتك و الحب حنانة .. حبيتك و الحب ماهوش خيانة .. بغيتك و الحب أمانة .. و بغيتك والله ماني ندمانة .. حبيتك .. و نحبك و نقعد نحبك شنانة .. و شنانة حبيتك .. و ماني خسرانة .. أنت هو حبيبي لي خيرتو أنا ..
الـفـــال :
لي هكدا حبيتيه .. الله يعافيه و يخليه .. و من حلاوتك يسقيه .. و ربي يهنيك و يهنيه

البوقالة رقم .. 26 .. في خاطر كامل لي يبدا اسمهم بالحرف " Z "

البوقالة :

زوينة يا زوينة .. و الزين ربي اعطاك .. و طبعاتك الحنينة .. لي ساجي .. يتقدم ليك .. وردة في يد لي اداك .. و يحفظك الله من العوينة .. و يخليك لَـلِّي ابغاك ..
الفال :
الزيـن ... و لاتـاي فين !! وين رايحة ويـن ؟؟ ربي يسترك من العيـن (آمين) ..



هادي البوقالة في خاطركم كامل من .. "A " للـ " Z "


البوقالة :

كيفاش أنا نحبك و أنتِ تشكي فيا.. ياك هديت قلبي لقلبك.. و درتك ممو عينيا .. اطلبي من خالقك في يوم تكوني ليا..داك اليوم يهني بالك و تقولي...واش راح عليا
الفـال :
عمرك ما تشكي فلي حبك ..الشك و الوسواس .. ماشي ملاح ياناس..

شكرا جزيلا اختي ريان
بوقالات جميلة جدا
تقبلي مروري بكل مودة